Act 11 | NdeIBE | STEP | Abaphostoli labazalwane kulo lonke elaseJudiya bezwa ukuthi abeZizwe labo base belamukele ilizwi likaNkulunkulu.

Acts 11

UPhethro Uyachaza Ngokwenza Kwakhe

1 Abaphostoli labazalwane kulo lonke elaseJudiya bezwa ukuthi abeZizwe labo base belamukele ilizwi likaNkulunkulu. 2 Yikho kwathi uPhethro esebuyele eJerusalema, abaJuda, amakholwa asokileyo, bamsola 3 bathi, “Wangena endlini yabantu abangasokanga wadla labo.”

4 UPhethro waqalisa ngokubendlalela konke wakucasisa njengokwenzakala kwakho: 5 Wathi, “Ngangisedolobheni laseJopha ngikhuleka, ngehlelwa yisiyeziphupho ngaba lombono. Ngabona ulutho lungathi lilembu elikhulu lisehliselwa phansi ngamagumbi alo womane livela ezulwini, lehlela phansi lapho engangikhona. 6 Ngakhangela phakathi kwalo ngabona izinyamazana zomhlaba zezinyawo ezine, izilo zeganga, izinanakazana lezinyoni zemoyeni. 7 Ngasengisizwa ilizwi lingitshela lisithi, ‘Phakama, Phethro. Bulala udle.’

8 “Ngaphendula ngathi, ‘Hatshi bo, Nkosi! Kowami umlomo kakukaze kungene ulutho olungahlanzekanga loba olungcolileyo.’

9 “Ilizwi lakhuluma okwesibili livela ezulwini lathi, ‘Ungabokuthi ulutho kaluhlanzekanga nxa seluhlanjululwe ngu-Nkulunkulu.’ 10 Lokhu kwenzakala kathathu, konke kwase kubuyiselwa njalo ezulwini.

11 “Ngasonaleso sikhathi amadoda amathathu ayethunywe kimi evela eKhesariya afika endlini engangihlala kuyo. 12 UMoya wangitshela ukuthi ngingathandabuzi ukuhamba labo. Laba abazalwane abayisithupha labo bahamba lami sayangena endlini yendoda leyo.

13 Yasitshela ukuthi yabona ingilosi endlini yayo isithi, ‘Biza uSimoni othiwa nguPhethro eJopha. 14 Uzakulethela ilizwi eliyilo elizakusindisa wena kanye lendlu yakho.’

15 “Kwathi ngiqalisa nje ukukhuluma, uMoya oNgcwele wehlela phezu kwabo njengoba wehlela kithi ekuqaleni. 16 Yikho ngase ngikhumbula okwatshiwo yiNkosi isithi, ‘UJohane wabhaphathiza ngamanzi, kodwa lina lizabhaphathizwa ngoMoya oNgcwele.’

17 Ngakho uma uNkulunkulu wabanika sona lesosipho asinika sona lapho sakholwa eNkosini uJesu Khristu, ngangingubani mina engangingakhumbula ukumelana loNkulunkulu na?”

18 Bathi sebekuzwile lokhu, kababe besaba lansolo, badumisa uNkulunkulu, besithi, “Yebo kambe, uNkulunkulu usebanikile labo abeZizwe ukuphendukela ekuphileni.”

Ibandla E-Antiyokhi

19 Kwathi labo ababehlakazekile ngenxa yokuhlukunyezwa okwakuphathelene loStefane bahamba baze bayafika eFenikhe, leKhuphro le-Antiyokhi betshumayela ilizwi kubaJuda kuphela. 20 Kodwa abanye babo, amadoda ayevela eKhuphro laseKhurene, baya e-Antiyokhi batshumayela kumaGriki lawo, bebatshela ngezindaba ezinhle ngeNkosi uJesu.

21 INkosi yayibasekela, yikho abantu abanengi bakholwa baphendukela eNkosini.

22 Ibandla eliseJerusalema lakuzwa lokhu laselithumela uBhanaba e-Antiyokhi.

23 Ekufikeni kwakhe wazibona izithelo zomusa kaNkulunkulu, wathokoza njalo wabakhuthaza bonke ukuthi baqinisele eNkosini ngezinhliziyo zabo zonke. 24 Wayeyindoda elungileyo, egcwele uMoya oNgcwele lokukholwa. Abantu abanengi kakhulu balethwa eNkosini.

25 UBhanaba wasesiya eThasu ukuyadinga uSawuli. 26 Esemfumene wahamba laye e-Antiyokhi. Yikho okomnyaka wonke uBhanaba loSawuli babehlangana lebandla befundisa abantu abanengi kakhulu. Abafundi baqalisa ukubizwa ngokuthi ngamaKhristu e-Antiyokhi.

27 Ngasonalesi isikhathi abanye abaphrofethi bafika e-Antiyokhi bevela eJerusalema. 28 Omunye wabo owayethiwa ngu-Agabhu wasukuma eholwa nguMoya wabonisa ukuthi kuzakuba lendlala embi eyayizabakhona kulolonke ilizwe lombuso wamaRoma. (Lokhu kwenzakala ngesikhathi sokubusa kukaKlawudiyu.) 29 Abafundi bazimisela ukunika usizo kubazalwane ababehlala eJudiya, ngulowo enika ngokwamandla akhe.

30 Bakwenza lokhu, bathumeza izipho zabo kubadala ngoBhanaba loSawuli.